Төрөөбүт Сахабыт сирэ ытыктыыр киһитэ, республикабыт биир киэҥ туттар салайааччыта, биһиги Чөркөөхтөөҕү историко-мемориальнай, федеральнай суолталаах, аһаҕас халлаан анныгар турар Саха сиринээҕи политсыылка музейын бочуоттаах мецената Иван Иванович Бочонин бүгүн 65 сааһын туолла!
Иван Ивановиһы салайааччы быһыытынан 1984-85 сыллартан билэбит. Ити кэмнэргэ төһө да эдэрин иһин, оройуоммут сайдыытыгар оччотооҕу биир төһүү оройуон киинин хаһаайыстыбыннай тэрилтэтин коммунальнай хаһаайыстыба сүрүн специалиһынан, ол кэннэ салайааччытынан салайар үлэтин саҕалаабыта.
Салайар үлэҕэ ити кэмнэргэ бэриниилээхтик үлэлии-хамсыы сылдьар ыччат киһини партия Алексеевскайдааҕы райкомун бюрота тэрилтэ коммунистарын, кырдьаҕас үлэһиттэрин кытта сүбэлэһэн, республикаҕа, оройуоҥҥа улахан хаалыылаах тэрилтэлэригэр ДРСУ-га бу тэрилтэни кадрынан бөҕөргөтүү бэрээдэгинэн, эдэр коммуниһы Тааттатааҕы ДРСУ-га сирэй салайааччытынан туруорбута.
Иван Иванович, бэрт аҕыйах үлэһиттээх, ахсааннаах хамныыр техникалаах тэрилтэ коллективын ити кэмнэртэн салайан, төрөөбүт оройуонун дьоно-сэргэтэ билэринэн, түөрт уонча сыл эҥкилэ суох салайан кэллэ. Билигин салайар ОАО “Тааттаавтодор” коллектива кэлин 20 тахса сылтан ыла кэмҥэ, күн бүгүнүгэр диэри Саха Республикатын биир бастыҥтан бастыҥ үлэлээх, суолу оҥорууга – тутууга аныгы техниканан толору хааччылыбыт, үчүгэй материальнай – техническэй базалаах, Саха сиригэр, бүтүн Россияҕа киэҥник биллэр бастыҥ үлэһиттэрдээх, специалистардаах, үчүгэй, бастыҥтан бастыҥ үлэлээх коллектив буоларын ситистэ!
Кэлин үйэ чиэппэрэ кэмҥэ дойдубут көрсүбүт араас ыарахаттарын аахсыбакка, Иван Иванович салайар тэрилтэтэ ОАО “Тааттаавтодор” коллектива бэриллибит, ылыммыт государственнай соруктарын сыллата чиэстээхтик толорору ситистэ. Тэрилтэтин үлэһиттэрин, дьиэ кэргэттэрин олохторун тупсарыыттан саҕалаан, бүтүн улууспут социальнай-экономическай сайдыытыгар боччумнаах, систиэмэлээх көмө оҥорон, оҥотторон кэллэ.
Улууска эдэр ыччаты дойдуга патриотуу тыыныгар, үлэҕэ иитиигэ, чөл олоҕу тутуһууга салайар коллектива күннэтэ үлэлэһэр.
Чөркөөхтөөҕү политсыылка музейыгар, музей тэриллиэҕиттэн, уһун кэмнээх, систиэмэлээх улахан көмөтүттэн астынабыт. Музейы тэрийээччи Д.К.Сивцев – Суорун Омоллоон “музейгытыгар көмөлөһүн” – диэн кэриэһин толорууга күүстээх үлэтин, көмөтүн үрдүктүк сыаналыыбыт, махтанабыт.
Россияҕа Президеммыт Владимир Владимирович Путин 2022 сыл культурнай нэһилиэстибэ сылынан биллэрбитинэн сибээстээн ОАО “Тааттаавтодор” коллектива үбүнэн көмөлөһөн музейбыт түөрт улахан суолталаах, федеральнай учуокка турар Э.К.Пекарскай балаҕанын, ити балаҕан салҕааһын “сибииккэтин”, сэттэ кырыылаах бабаарына, ити бабаарына ампаар салҕааһынныын иккис тыыннарын ыллылар, реставрацияланнылар.
Чөркөөх музейын коллектива Иван Ивановичка уонна салайар коллективыгар элбэх сыллаах көмөлөрүн иһин сахалыы эттэххэ, сиргэ тиийэ сүгүрүйэн, нууччалыы эттэххэ Ийэ буорга тиийэ бокулуоннаан туран махтанабыт!
Ийэ дойдубугар Россияҕа президеммыт Владимир Владимирович Путин 2022 сыл – культурнай нэһилиэстибэ сылын биллэрэн туруорбут соруктарын толорууга, быһаарыыга Иван Иванович Бочонин салайар коллектива улахан боччумнаах көмөнү оҥорбутунан киэн туттабыт, астынабыт. Инникитин да өбүгэлэрбит алгыстарынан: “Эһигини тэппит атаххытын кубулутума”, – диэн алгыыбыт!
Чөркөөхтөөҕү саха сирин сыылката музей сэбиэдиссэйэ Николай Ефимович Попов уонна музей коллектива
Тохсунньу 31 күнэ, 2023 сыл