Уол оҕону сахалыы сиэргэ-майгыга иитэргэ, өй-санаа өттүнэн киэҥ билиилээх, таһымнаах буола улаатарыгар аналлаах «Басхан» диэн күрэх 7-с төгүлүн ыытылынна. Быйылгы сылга Ньурба улууһуттан кытта кэлбиттэрэ олус кэрэхсэбиллээх. Онон күрэх географията сыллата кэҥээн иһэр.

Үгэс курдук ыытыллар 5 түһүмэххэ 11 уол күөн күрэстэстилэр.

«Удьуор утума» түһүмэххэ бэйэлэрин төрүттэригэр туох дьоҕурдаах, талааннаах, үлэһит дьон баарын сиһилии билиһиннэрдилэр.

«Дойду салайааччылара – мин харахпынан»  диэн түһүмэххэ араас политиктар олохторун, салайар ньымаларын туһунан санааларын толору этиннилэр. Салгыы экспертэр «аны уон сылынан мин нэһилиэгим сайдар суола» диэн ыйытыыларыгар төрөөбүт нэһилиэктэрэ аны уон сылынан хайдах сайдыаҕын туһунан баҕа санааларын, инники көрүүлэрин иһиттибит.

«Өркөн өй» блиц-ыйытыыларын Үөһээ Бүлүүтээҕи оҕо библиотекатын үлэһитэ Майя Федоровна Захарова уол оҕолор интэриэһиргиир  ыйытыыларын бэлэмнээн кэлэн, уолаттар уопсай билиилэрин тургутта.

Дебат – дьыалабыай оонньууну М.А.Алексеев аатынан Үөһээ Бүлүүтээҕи республиканскай лицей-интернат историяҕа учуутала Айаал Трифонович Мохначевскай аан дойдутааҕы дебат күрэхтэһиитин усулуобуйатынан «Үтүө дьыала: уустук, судургу» темаҕа ыытта. Уолаттар саҥа технологиянан ыытыллыбыт дебакка олус көхтөөхтүк кытыннылар.

Уолаттар айар дьоҕурдарын «Айыы умсулҕана» түһүмэххэ көрдөрдүлэр. Бэриллибит икки строкаҕа салгыы хоһоон айдылар.

Түмүккэ кылаан кыайыыны ситистэ түһүмэхтэргэ уһулуччу көрдөрүүлээх -М.А.Алексеев аатынан Үөһээ Бүлүүтээҕи республиканскай лицей-интернат 10 кылааһын үөрэнээччитэ Стас Андреев, 1 миэстэ – Никита Аянитов, Д.С.Спиридонов аатынан Үөһээ Бүлүүтээҕи 4 №-х орто оскуола, 10 кылаас, 2 миэстэ – Алексей Николаев, Мэйик сүрүн оскуолата, 8 кылаас, 3 миэстэ – Святослав Торохов, Ньурба улууһун Акана орто оскуолата, 8 кылаас. Кыттыбыт уолаттар хас биирдиилэрэ анал аат ыллылар.

Саргылана Ильина, «Сомоҕо» оҕо хамсааһынын салайааччыта,

Евдокия Семенова, И.Н.Барахов аатынан СӨ Государственноһын музейын үлэһитэ.