Бүгүн олунньу 12 күнүгэр уһулуччулаах государственнай уонна политическай деятель И.Н.Барахов төрөөбүт күнэ. Бу күн төрөөбүт-үөскээбит Харбалааҕар, Үөһээ Бүлүүгэ,  мэҥэ тааһыгар сүгүрүйүү буолла. «Харбалаах нэһилиэгэ» МТ баһылыга Кузьмин И.И., И.Н.Барахов аатынан Судаарыстыбаннас музейын сэбиэдиссэйэ Копыленко С.Д. , улуустааҕы үөрэх салаатын начальнига Борбуев С.О. саха саарына И.Н.Барахов төрөөбүт күнүнэн эҕэрдэ тылларын эттилэр. Мустубут дьон-сэргэ чулуу уолларын мэҥэ тааһыгар сүгүрүйэн сибэкки дьөрбөтүн уурдулар.

Бу күнтэн саҕалаан улуустааҕы култуура дьиэтигэр «Вся жизнь служение народу» диэн ааттаах быыстапка турда. Манна кини чаҕылхай олоҕун туоһулуур араас докумуоннар, үлэтигэр-хамнаһыгар туттубут кинигэлэрэ, араас кэмнээх хаартыскалар, 1926 сыллаахха Бүтүн союзтааҕы Түүр омуктар сийиэстэригэр  сахалыы алпаабыт туһунан дакылаата туруорулуннулар.

Ийэ тылбыт сайдар кэскилин түстэспит, саха тылын судаарыстыбаннай таһымҥа таһаарбыт, Саха сирин экономикатын научнай төрүккэ олоҕуран ырыппыт, барҕарыы суолларын ыйбыт, аптамыайаны төрүттэспит  И.Н.Барахов  төрөөбүт күнүн ити курдук бэлиэтээтибит.

Семенова Е.П.,

И.Н.Барахов аатынан судаарыстыбаннас

музейын үлэһитэ