Бу күнү бэлиэтиир тэрээһиҥҥэ биир идэлээхтэрбит кэлэн ыалдьыттаан бардылар: И.Н.Барахов аатынан Үөһээ Бүлүүтээҕи 1-кы нүөмэрдэх оскуола (салайааччы Ченохова Т.В.), К.С.Чиряев аатынан Ороһутааҕы народнай педагогика киинэ (директор Васильева Р.А.), Үөһээ Бүлүү улууһун историятын уонна этнографиятын музейа (директор Сыбахов П.А.). Арчылааһын кэннэ “Үөһэээ Бүлүү улууһа” МР баһылыгын солбуйааччы Тойтонова Л.С., култуура департаменын начальнига Петрова С.С. музейдар күннэринэн эҕэрдэ сурук туттардылар. 20-с үбүлүөйдээх Манчаары оонньууларыгар музейдар үлэлэрин чопчулааһын туһунан киэҥ хабааннаах кэпсэтии ыыттылар.
Салгыы улууспут музейдара үлэлэрин-хамнастарын сиһилии кэпсээтилэр. Ол курдук И.Н.Барахов аатынан 1-кы нүөмэрдээх оскуола музейа виртуальнай музей оҥосторугар матырыйаалларын бэлэмнээбиттэрин, хайдах оҥорбуттарын кэпсээн киэҥ сэҥээриини ылла, үлэлэрин түмпүттэрин бука барыбытыгар диискэнэн бэлэхтээтилэр. Ороһутааҕы Народнай педагогика Киинэ ураты суоллаах-иистээх буолара бу сырыыга да көһүннэ, уол уонна кыыс иитиитигэр араас тэрээһиннэри К.С.Чиряев 90 сааһын көрсө ыытар үлэлэри ыыталлар эбит. История уонна этнография музейын үлэһиттэрэ экспозиционнай саалаларын тупсарбыттарын, эбии павильоннары тута сылдьалларын билиһиннэрдилэр. «Раритеты Верхневилюйского улуса» диэн быыстапкаларын, экспонаттарын кэпсээтилэр. Маны таһынан биһиги кыраайы үөрэтиигэ бэйэбит үлэбитин, саҥа проектарбытын билиһиннэрдибит.

Кэлбит ыалдьыттарбыт хас биирдиилэрэ музейдарын сыаналаах малларын аҕалан туруордулар: муос оҥоһуктар, ат киэргэлэ, балык тириитэ суумкалар, таҥара холоруга о.д.а. Манна биһиги ыалдьыппыт, Харбалаах нэһилиэгин олохтооҕо, РСФСР үөрэҕириитин туйгуна, үлэ бэтэрээнэ Шестакова А.Н. бэйэтин дьиэ кэргэнин сыаналаах малларын быыстапкаҕа аҕалла.
Түмэл күнүн ити курдук таһаарыылаахтык биһиги улууспутугар, Үөһээ Бүлүүгэ, буолла.

Түмэл сотрудниктара Семенова Е.П.,Тоскина С.А., Гурьева Л.В.
19.05.2017 с.